Ленин округу боюнча кайра шайлоого катышуу үчүн арыздарды кабыл алуу аяктады
- 12 месяцев мурун
Борбордук шайлоо комиссиясы (БШК) 11-августта Бишкектин Ленин округу боюнча кайра шайлоого катышуу үчүн арыздарды кабыл алуу аяктаганын кабарлады.
Мекеменин маалыматы боюнча, кечээ, 10-августта дагы төрт жарандан шайлоого катышуу үчүн арыз түшүп, талапкер болууну каалагандардын жалпы саны 34кө жетти.
Учурда алардын ичинен алтоо документтерин тапшырып, талапкер катары катталды. Алар: Аскар Алмаз уулу, Токтогул Какчекеев, Эртай Искаков, Турсунбай Бакир уулу, Сулайман Мамаев, Жамалбек Ырсалиев.
Ал эми ушул округдан депутат болгон, мандатын мөөнөтүнөн мурда тапшырган Жаныбек Абировдун кайра шайлоого катышуу арызы 2-августта четке кагылган.
Мекеме эми арыз жазгандар же алардын ыйгарым укуктуу өкүлдөрү 13-август саат 18:00гө чейин талап кылынган документтерди БШКга бериши керектигин эскертти.
Бишкек шаарынын бир мандаттуу Ленин райондук №26 шайлоо округунда мөөнөтүнөн мурда кайра шайлоо 10-сентябрга белгиленген.
28-майда саат 20:00дө Бишкек шаарынын бир мандаттуу Ленин шайлоо округунда Жогорку Кеңештин депутатын мөөнөтүнөн мурда шайлоо өттү. АСУ маалыматы боюнча Дамира Ниязалиева 6242 шайлоочунун добушун же 35,83% добуш алганы маалымдалган. Бирок 29-майдын кечинде талапкер Дамира Ниязалиеванын штабынын эки кызматкери кылмыш-жаза кодексинин “Шайлоочулардын добуштарын сатып алуу” беренесине шек саналып кармалган.
Борбордук шайлоо комиссиясы Бишкектин Ленин районунда өткөн Жогорку Кеңештин депутаттыгына шайлоонун жыйынтыгын жараксыз деп тапты. Мындай чечимди БШК 16-июнда өткөн жыйынында кабыл алды. Буга мыйзам бузууларга байланыштуу шайлоодо биринчи орунду алган Дамира Ниязалиеванын жана экинчи болгон Улан Сариевдин каттоосу жокко чыгарылганы негиз болду.
