Чоң Кызыл-Суу капчыгайында Борбор Азия жаштарынын жайкы лагери өтүүдө  

Ысык-Көл облусунун Чоң Кызыл-Суу капчыгайында Кыргызстан, Тажикстан, Казакстан, Өзбекстан жана Түркмөнстандан жаштардын катышуусунда Борбордук Азиянын “Климат–Жаштар–Тоолор” аймактык жаштар жайкы лагери өтүп жатат.

Иш-чара Тянь-Шань эл аралык илимий борборунун базасында ЕККУ, ФАОнун колдоосу менен уюштурулган.

Жаштардын климаттын өзгөрүшү, тоолуу аймактардын туруктуулугу боюнча билимдерин жана практикалык көндүмдөрүн жогорулатууга багытталган.

Лагердин расмий ачылышы Кыргыз Республикасынын президентинин тоо күн тартиби боюнча атайын өкүлү Динара Кемелова, Улуттук илимдер академиясынын Суу маселелери жана гидроэнергетика институтунун директору Рысбек Сатылканов, ошондой эле ЕККУ жана ФАОнун өкүлдөрүнүн катышуусунда өттү.

Динара Кемелова өз сөзүндө тоолуу аймактарды өнүктүрүү боюнча беш жылдык аракеттердин аймактык деңгээлде ишке ашырылышы, ошондой эле Кыргызстандын өнөктөштөрдүн колдоосу менен глобалдык климаттык процесстердин алкагында тоо күн тартибин илгерилетүүдөгү жетишкендиктери тууралуу айтып берди.

Лагердин программасы теорияны талаа практикалары менен айкалыштырат.

Катышуучулар Чоң-Кызыл-Суу бийик тоолуу станциясында метеорологиялык жана гидрологиялык байкоолорду жүргүзүшөт, аймакты суу менен камсыз кылуудагы мөңгүлөрдүн ролун изилдешет, климаттык маалыматтарды чогултуу үчүн мөңгүгө экспедициялык саякатка чыгышат, ошондой эле бирге айыл чарбасын климаттын өзгөрүшүнө ыңгайлаштыруу боюнча сессияга катышат.

Сүрөт: president.kg