Бишкекте Украинаны колдоо акциясы өттү

24-февралда Бишкекте Орусиянын Кыргызстандагы элчилигинин алдында Украинаны колдоо акциясы болуп өттү.

«ПолитКлиника» медиасынын кабарчылары тынчтык митингине 50га жакын адам чогулганын билдиришти. Алар «Тынчтык керек», «Согушка жол жок», «Украинага даңк» деген баракчаларды көтөрүп чыгышкан.

Орусиянын президенти Владимир Путин 24-февралда таң эрте билдирүү жасап, Донбасста атайын аскердик операция баштоо тууралуу чечим кабыл алганын билдирди. Ал украин жоокерлерин куралдарын тапшырып, үйлөрүнө кайтууга чакырды. Таңкы саат бештерде орус аскерлери Украинага чабуул жасашты.

Ушул тапта Украинанын борбору Киев баштаган шаарларда, Краматорск, Харьков, Донецк жана башка облустарда, чек арадагы аймактарда жардыруу, аткылоо тууралуу маалыматтар тарап жатат. Украинанын Ички иштер министрлиги аскердик башкармалыктарга, аэродромдорго, аскердик кампаларга жана чек ара пункттарына ракеталык октор атылганын ырастады.

Украинанын президенти Владимир Зеленский бул аракетти өлкөгө ачылган согуш деп атап, Орусиянын Украинага кол салуусуна байланыштуу дүйнөлүк лидерлерди Путинге каршы коалиция түзүүгө чакырды.