Кемпир-Абад иши: соттук отурум 6-августка белгиленди

Кемпир-Абад иши боюнча Бишкек шаардык сотундагы отурум 6-августка белгиленди. Бул тууралуу айыпталуучулардын бири, саясатчы Равшан Жээнбеков өзүнүн Фейсбук баракчасына жазып чыкты.

Эскерте кетсек, 12-июлда прокуратура Кемпир-Абад иши боюнча Биринчи май райондук сотунун актаган чечимине каршы Бишкек шаардык сотко кайрадан жаңы апелляциялык сунуш берген.

Анда прокурорлор Медер Абдышев жана Замира Байбагышова Кемпир-Абад иши боюнча Биринчи май райондук соту тарабынан акталган саясатчы, активисттердин актоо чечимдерин жокко чыгарып, коюлган айыптары боюнча бардыгын күнөөлүү деп таап, жаза берүүнү суранышкан.

14-июнда Бишкектин Биринчи май райондук сотунун судьясы Марат Сыдыков Кемпир-Абад иши боюнча “Массалык башаламандыктар” жана “Бийликти күч менен басып алуу” беренелери менен шек саналган саясатчы активисттердин баарын актаган.

Сүрөт: интернет булактары