Коронавирус бар жана мен аны жеңдим – Кымбат Турдубекова

Каарманыбыз Кымбат Турдубекова журналист болуп иштейт. Ал жумушуна байланыштуу Covid-19 менен ооруп, айыккандардан маек алып иштеп жүргөн. Бул вирусту ошол учурда жуктурганбы, же башка жактан жуктурганбы, айтор, ошол күндөрдүн биринде өзү дагы ооруп калган.

Адегенде Кымбат коронавирусту жуктуруп алам деп ойлогон да, кооптонгон да эмес.

Алгач эле көкүрөгү ачышып бир башкача ооруганын айтат Кымбат. Ошондо ал «Балким, мага жугуп калдыбы?» деп кооптонуп рентгенге түшкөн. Чынында эле рентгенден эки тараптуу пневмония деген жыйынтык чыгат. Доктур дарыларды жазып, аларды иче баштайт. Ал акыбалы жакшы эле болуп жаткан.

«Анан эле дене табым 38.7ге чейин көтөрүлүп, шалдырап, кара тер басып, чыйрыгып жатып калдым. Канчалык калың кийинип, кабат-кабат төшөк жамынсам да такыр жылыбай койдум.Сууну көп ичип, атайын көнүгүүлөрдү деле жасап жаттым. Үч күн өткөндөн кийин абалым күндөн-күнгө начарлай баштады. Дем алуум оорлошум, тамагым кычышып, жөтөл пайда болду», — деп эскерет ал күндөрүн Кымбат.

Алгач жазып берген дарылар Кымбатка жардам бербей, үч күндөн кийин ысык уколдорду ала баштаган. Бирок, бул дарылардын таасири билинбей, кыйналгандан кыйнала берген. Алтургай төшөктөн тура албай жатып калган.

«Денемди калтырап басып, титиреп… Дем ала албай… өзгөчө кечки саат бештен кийин аябай кыйналып, дем алганга аба таппай эшикке чуркап чыккан учурум болуп атты. Кайра өзүмдү алаксытып «дарыларын ичип атам, ысык уколун алып атам» жакшы болуп кетем деп аттым», — дейт Кымбат көзүнө жаш алып.

Ооруканага жатайын десе ПЧР тесттин жыйынтыгын талап кылышат, тест тапшырайын десе, 118 номериндегилерден «акыбалыңыз жакшы эле экен, суюктукту көп-көп ичип, үйүңүздө эле болуңуз» деген жоопту алат.

Дем жетпей калган учурда, аба издеп кыйнылганын азыр эстегенде жаман болот.

«Кечки саат сегиздерде дем жетпей, мени бирөө келип муунтуп аткандай, «мына азыр өлтүрөт» деген сыяктуу башкача сезимдер болуп атты. Ошол убакта жолдошум да жумуштан келип калган эле. Бут кийимимди да чала-була кийип алып эшикке чуркап чыгып шамаал издеп баштадым. Жел болсо ошол жактан дем алам деп ойлодум го оюмда», — дейт Кымбат.

Айла кеткенде ыктыярчылар ачкан «Ынтымак» обсервациясына барганын айтат. Ал жакта врачтар текшерип «Сатурация бир аз түшүп кеткени болбосо жакшы эле. Бул жакта сизден жаман ооругандар жатат. Аларды көрүп жаман болосуз. Андан көрө үйгө жазып берген дарыларды ала бериңиз» деп мага кайра башка дары-дармектерди, ысык уколдорду, гипарин жазып беришти», — дейт ал.

«Ошол учурда менин ичим өтүп, кусуп, аба жетпей аябай кыйналып аткам. Көнүгүүлөрдү жаса дешти. Бирок, аны жасаганга да абалым келбей турган. Шалдырап эле жатып, эки-үч күндөн бери эч нерсе ичпесең же баспасаң, алың кетип жата берет экенсиң да. Гипаринди эки күн алгандан кийин кадимкидей аппетитим ачылып, маанайым да бир аз көтөрүлүп, бир аз басып, көнүгүүлөрдү жасап аттым. Ошол мага жардам берди окшойт», — дейт ал.

Дем алганы оорлогондо кычкылтек аппаратын алып, ошону менен дем алышың керек деп айтышат. Аппарат менен дем алгандан кийин Кымбат кеске көбүк түкүргөнүн эстейт.

Биздин каарманыбыз ооруп аткан кезде коронавирустан каза болгондор көбөйгөн. Бул нерсе дагы оорулуунун эмоциясына таасирин тийгизбей койгон жок.