Тажик бийлигин өлкөдөгү эпидемиологиялык абалды түшүндүрүп берүүгө чакырышты

Тажиккстанда коомдук уюмдар менен жарандык активисттер Саламаттык сактоо министрлигин коронавирус пандемиясына байланышкан өлкөдөгү абал боюнча түшүндүрмө берүүгө чакырышты.

Министрликке жолдонгон катка өлкөдөгү 18 коомдук уюмдун өкүлдөрү жана жарандык активисттер кол коюшкан.

«Орусия менен Кытайдан келген тесттер канчалык ишенимдүү? Орусияда алардын сапатынан өздөрү шек санап жатышат, кытай тесттеринде кемчиликтер табылган. Министрлик анализдин жыйынтыктары боюнча кошумча тесттерди өткөрүп жатабы? Тесттердин эл аралык сертификаттары барбы? Алар Дүйнөлүк саламаттык сактоо уюму тарабынан жактырылды беле?», — деп жазылган катта.

Буга чейин бир катар өлкө жетекчилери Кытай менен Орусияда өндүрүлгөн тест-системалардын сапатынан күмөн санаган билдирүүлөрдү жасашкан. Өткөн жумада Беларустун президенти Александр Лукашенко Орусиянын «Вектор» илимий борборуна таандык тест-системалардын вирусту аныктоо тактыгы болгону 30 гана пайызды түзөрүн сынга алган.

Тажикстандын саламаттык сактоо министрлиги жергиликтүү лабораторияларда чыккан тесттин жыйынтыктары текшерүү үчүн чет өлкөлөргө, анын ичинде Лондонго жөнөтүлүп жатканын билдирүүдө. Мындан улам жарандык коом Тажикстандын аба мейкиндиги толук жабык болсо, анализдер чет өлкөлөргө кандай жөнөтүлүп жатканына кызыгышты.

Мындан тышкары алар Саламаттык сактоо министрлигин пневмония, кургак учук сыяктуу оорулар боюнча 2019чу жана 2020-жылдардын биринчи кварталы үчүн статистикалык маалыматтарды жарыялоого чакырышты.

Акыркы күндөрү Жаббор Расулов районунун эки тургуну, Шахристандагы ашпозчунун жана Душанбе шаардык прокуратурасынын кызматкеринин өлүмүнөн улам жарандар өлкөдө коронавирус жок экенинен күмөн санап, кызуу талкуу башталган. Бийлик алар пневмония, кургак учуктан каза болгонун билдирген.

17-апрелде Тажикстандын саламаттык сактоо министринин орун басары өлкөдө пневмониядан улам каза болгондордун кескин көбөйүшү «аба ырайынын таасирине байланыштуу» экенин билдирген.

Расмий маалыматтарга ылайык, Тажикстанда 20-февралдан бери 8 212 киши карантинге алынган. Бүгүнкү күндө алардын 1083ү обсервацияда.

21-апрелге карата дүйнөнүн 185 өлкөсүнөн коронавируска 2 492 963 киши чалдыкты. 171 152 киши каза тапты, 4 млн дон ашык киши айыкты. Ал эми Тажикстанда коронавирус катталган учур боло элек.

Сүрөт: Radio Ozodi.