Жогорку Кеңеш Медербек Сатыевди Жогорку соттун төрагалыгына дайындоого макулдук берди

Бүгүн, 23-октябрда, Жогорку Кеңештин депутаттары Медербек Сатыевди Жогорку соттун төрагалыгына дайындоого макулдук берди. Жыйынга катышып отурган 78 депутаттын 75и макулдук берди.  

Жогорку Кеңештин Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитети кезексиз жыйынында Медербек Сатыевди Жогорку соттун төрагасы кызматына дайындоого макулдук берүү маселесин карап, жактырган. 

Президенттин жана Министрлер кабинетинин Жогорку Кеңештеги туруктуу өкүлү Алмасбек Абытов президенттин тиешелүү сунуштамасы менен тааныштырды. 

22-октябрда Соттор кеңешинин жыйынында  Жогорку соттун төрагасы кызматына Медербек Сатыевдин талапкерлиги каралды жана бир добуштан колдоого алынды.

Жогорку соттун төрагалыгы кызмат ордуна Медербек Сатыев келиши мүмкүнтэкенин Kaktus.media анонимдүү булактарына таянып, жазып чыккан.

«2013-жылы Медербек Сатыев ал учурда бийликти күч менен басып алууга аракет кылган деп айыпталган ЖКнын депутаттары Садыр Жапаров, Камчыбек Ташиев жана Талант Мамытовду актаган Бишкек шаардык сотунун кылмыш иштери боюнча соттук коллегиясынын курамында болгон. Жыйынтыгында Медербек Сатыев «кылмыш ишин кароодо Кыргыз Республикасынын Жазык-процесстик кодексин одоно бузгандыгы үчүн» кызматынан бошотулган» деп айтылат Kaktus.mediaнын маалыматында.

Медербек Сатыев 2020-жылдан 2021-жылдын 7-майына чейин президенттин аппаратынын жетекчиси 1-орун басары, андан кийин президенттин администрациясынын жетекчисинин биринчи орун басары болуп иштеген.
2021-жылы президенттин администрациясынын соттор жана прокуратура органдары менен өз ара аракеттенүү бөлүмүндө, 2022-2023-жылдары Кыргызстандын Жогорку сотуна караштуу Сот департаментинин директору кызматында иштеген. 2024-жылдын 10-январынан тартып Жогорку соттун судьясы болуп иштеп жатат.

Ал 2015-жылы “Республика-Ата Журт” партиясынын тизмеси боюнча 43-орун менен депутаттыкка ат салышкан.

Замирбек Базарбеков 9-октябрда Жогорку соттун төрагасы кызматынан кетүү тууралуу арыз жазганын жергиликтүү ЖМКлар жазып чыгышкан. Ал Жогорку соттун төрагалыгына 2022-жылы дайындалган.

Сүрөттө: Медербек Сатыев. Интернет булактарынан