Ысык-Көлдө чек арачылар үчүн пансионат ачылды

Садыр Жапаров бүгүн, 4-июнда, Улуттук коопсуздук мамлекеттик комитетинин (УКМК) Чек ара кызматынын жаңы ведомстволук пансионатынын ачылышына катышты.

Пансионат Ысык-Көлдүн жээгиндеги Чок-Тал айылында жайгашкан. Өткөн жылы мурдагы «Дельфин+» пансионатынын аймагы бөлүнүп берилген, ал эми 2022-жылдын декабрынан тартып капиталдык курулуш жана объектти кайра куруу иштери жүргүзүлгөн.

Бул жерде заманбап ыңгайлуу корпустар, коттедждер, ден соолукту чыңдоочу жай, конгресс-холл, пансионаттын жашыл аймагы курулган, анда балдар ойноочу аянтчалары да бар.

Чек арачылар өлкөнүн бардык облустарынан, анын ичинде алыскы райондордон келип, үй-бүлөлөрү менен бирге толук кандуу эс алууга жана ден соолугун чыңдоого мүмкүнчүлүк алышат.

Эгемендүүлүк жылдарында Ысык-Көлдө биринчи жолу чек арачылар үчүн ведомстволук пансионат ачылгандыгын белгилей кетүү маанилүү.

Чогулгандардын алдында сүйлөп, мамлекет башчы чек арачы — күнү-түнү, суукта жана ысыкта мамлекеттик чек араны кайтарган Мекенди коргоочу кесибинин маанилүүлүгүн баса белгиледи.

Президент пансионатта түзүлгөн жашоо шарттары менен таанышып, корпустарды жана эс алуу зоналарын карап чыкты.