Улуу Үркүн окуясына арналган эскерүү жүрүшү башталды
- 2 года мурун
Бүгүн, 5-августта “Эсимде” изилдөө аянтчасы 1916-жылдагы көтөрүлүш жана Үркүн окуяларына арналган эскерүү жүрүшүн баштады. Жүрүш 14-августка чейин уланат.
«Эсимде» изилдөө аянтчасынын сайтындагы маалыматка ылайык, иш-чаранын алкагында жүрүштүн катышуучулары 1916-жылдагы трагедияларга байланышкан эс тутум жайларын зыярат кылышат.
Жүрүш Чүй өрөөнүнөн башталып, Ысык-Көлдүн күңгөй жана тескей тараптарын камтып, Сырт ашууларына чейин уланат.
«Жүрүштүн негизги максаты — колониализмдин курмандыгы болгон ата-бабаларыбызды эскерүү, 1916-жылдагы окуяларга байланышкан эс тутум жайларын коомдук эс тутумда актуалдаштыруу.
Бул трагедияны коомдун аңдап түшүнүүсүнө түрткү берүү жана бул окуяларга байланышкан эс тутум жайларын изилдөө», — деп айтылат маалыматта.
Кыргызстанда август айынын биринчи жума күнү 1916-жылдагы Үркүндүн курмандыктарын эскерүү датасы катары аныкталган. Үркүн окуялары Кыргызстанда 7-8-ноябрда да Тарых жана ата-бабаларды эскерүү күндөрүндө эскерилет.
Сүрөт: «Азаттык» радиосу
