УКМК: «Бишкек ШИИБинин улук ыкчам кызматкери пара алып жаткан жеринен кармалды»

Бишкек ШИИБинин Кылмыш иликтөө башкармалыгынын ыкчам издөө бөлүмүнүн улук ыкчам кызматкери пара алып жаткан жеринен кармалды. Бул тууралуу Улуттук коопсуздук мамлекеттик комитетинин басма сөз кызматы билдирди.

УКМК тарабынан Ички иштер министрлигинин ички иликтөө кызматы менен биргеликте үстүбүздөгү жылдын 19-июнунда жума сайын берилип турчу 10- 15 миң сом өлчөмүндө акча каражатын алып жаткан жеринен Бишкек ШИИБдин Кылмыш иликтөө башкармалыгынын ыкчам издөө бөлүмүнүн улук ыкчам кызматкери милициянын капитаны А.Ч.Т. кармалды.

Учурда бул кылмышка тиешеси бар башка кызматкерлерди аныктоо боюнча зарыл болгон тергөө-ыкчам иш-чаралары жүргүзүлүүдө.

Бул иш боюнча Бишкек ШИИБинин Кылмыш иликтөө башкармалыгынын бөлүмүнүн башчысы К.Б. УКМКга алып келинди. А.Ч. жана К.Б.га карата жашаган жеринде, автоунааларда, ошондой эле
кызматтык бөлмөлөрдө тинтүү иштери жүргүзүлдү.

Кылмыш-жаза процессуалдык кодексинин 96-беренесине ылайык кармалган А.Ч. УКМКнын тергөө абагынын убактылуу кармоочу жайына киргизилди.