Таластагы мал уурулукка шектүү жаран Токтогул районунан кармалды
- 1 год мурун
Таластагы мал уурулукка шектүү жаран Токтогул районунан кармалды. Бул тууралуу Талас ОИИБинин басма сөз кызматынан билдиришти.
Маалыматка ылайык, 1-апрель күнү Талас шаарынын тургуну Д.Д. аттуу жаран арызы менен кайрылган. Анда үйүнүн короосунан 1 баш уйду белгисиз жарандар уурдап кеткендигин кабарлаган.
Аталган факты Талас ШИИБнин кылмыштардын бирдиктүү реестрине катталып, тергөөгө чейинки текшерүү иши башталган. Кылмыш жаза кодексинин 205-беренеси менен кылмыш иши козголгон. Талас ШИИБдин кызматкерлеринин ыкчам аракеттеринин негизинде уурдалган уй Жалал-Абад облусуна караштуу Токтогул райондук мал базарда аныкталып, Жалал-Абад ОИИБдин кызматкерлери менен бирдикте кылмышка шектүү кармалган. Ал Талас шаарынын 20 жаштагы У.Д. аттуу жаран экендиги жана мал базардан уйду 35 миң сомго баалап сатып жаткандыгы такталып, ошол учурда кармалган. Шектүү Талас шаарына алынып келинип, Талас ОИИБдин убактылуу кармоочу жайына киргизилди. Учурда тергөө амалдары жүрүп жатат.
