«Пирамида» телеканалын «Кумтөрдүн», «Бешинчи каналды» Бишкек мэриясынын башкаруусуна берүү каралууда

Мамлекеттик мүлктү башкаруу фонду «Пирамида» жана «Бешинчи канал» телеканалдарын башка мамлекеттик мекемелердин балансына өткөрүү маселесин карап жатат. Бул тууралуу «Азаттык» медиасына фонддун төрага орун басары Медер Машиев билдирген.

Анын айтымында, «Пирамида» телеканалы «Кумтөрдүн» же «Кыргыз алтын» мамлекеттик ишканасынын, «Бешинчи канал» Бишкек мэриясынын башкаруусунда болот.

Машиев телеканалдарды башка мекемелерге өткөрүп берүүнүн себептеринин бири – Мамлекеттик мүлктү башкаруу фонду тарабынан каржылоонун жетишсиз болуп жатканы экенин билдирди.

«Жогорку Кеңеш азыр менчиктештирүү боюнча программаны карап жатат. Уставдык капиталдын программасына бул эки телеканал да киргизилген. Тактап айтканда, телеканалдардын ээси башка мамлекеттик мекемелер болот. Биз бул маселени чарбалык субъектилер телеканалдарды жакшыраак өнүктүрсүн деген максатта карап жатабыз», – деди Машиев.

Ал мамлекеттик телеканалдарды башка мекемелерге өткөрүп берүү маселеси бир нече айдын ичинде чечилерин кошумчалады.

«Бешинчи канал» 2005-жылы «КООРТ» телеканалынын базасында түзүлгөн. 2010-жылы Убактылуу Өкмөттүн декрети менен улутташтырылган. 2011-жылы Жогорку Кеңештин ишин чагылдыруу максатында «Бешинчи канал» жабык акционердик коому жөнүндө» мыйзам кабыл алынган.

Кыргызстанда туңгуч эркин телеканал катары таанылган «Пирамида» мурдагы бийликтин тушунда колдон колго өтүп, 2010-жылдагы апрель окуяларынан кийин мамлекеттин карамагына берилген.