Опузалап пара алууга шектелген Кара-Суу районунун сот аткаруучу кармалды
- 8 месяцев мурун
Опузалап пара алууга шектелген Кара-Суу районунун сот аткаруучу кармалды. Бул тууралуу Ички иштер министрлигинин басма сөз кызматынан билдиришти.
Ош облустук ички иштер башкармалыгына Кара-Суу районунун 1964-жылы туулган Т.М. аттуу тургуну арыз менен кайрылган. «Анда 2023-жылдын 23-декабрынан тартып “С.” аттуу, Кара-Суу районунун сот аткаруучусу, Кыргыз Республикасынын чек арасынан өтүү үчүн чектөөнү алып берем деп опузалап, пара талап кылып жаткандыгын билдирген.
Топтолгон материалдардын негизинде, аталган факты боюнча Кылмыш-жаза кодексинин 343-беренеси (Опузалап пара алуу) боюнча кылмыш иши козголгон. 11-январь күнү жүргүзүлгөн ыкчам-издөө иш-чараларынын натыйжасында, Жогорку Сотко караштуу сот департаментинин, Ош облусунун Кара-Суу райондук САКБнүн сот аткаруучусу, юстициянын 3-класстагы кеңешчиси 1980-жылы туулган С.С. аттуу жаран 20 000 ( жыйырма миң) сом атайын белги коюлган акча каражатын алып жаткан жеринен кылмышка шектүү катары кармалган», — деп жазылат маалыматта.
Азыркы учурда Ош облустук ички иштер башкармалыгы тарабынан тергөө амалдары жүргүзүлүүдө.
