Нарында 7 жаштагы кызды өлтүрүүгө шектүү жаран кармалды
- 1 год мурун
Нарын облусунун Нарын районунда дайынсыз жоголгон 7 жашар кыздын сөөгү табылып, анын өлүмүнө шектүү катары 64 жаштагы айылдашы кармалды. Бул тууралуу облустук милициядан кабарлашты.
Маалыматка ылайык, 28-апрелде саат 21:00 чамасында милицияга Орто-Нура айылынын А.к.Н. аттуу тургуну кайрылып, 7 жаштагы кызы Ж.А.Ж. ошол күнү саат 12де үйүнөн чыгып, мектепке кеткен бойдон дайынсыз болуп жатканын билдирген.
Ошол эле күнү айыл эли чогулуп, издөө иштерин уюштуруп, болжол менен саат 22:10 чамасында аталган айылдагы кароосуз калган үйдүн ичинен кыздын сөөгүн табышкан. Сыртынан кароо жүргүзүүдө күч колдонулган белгилери аныкталган.
Кылмышка шектүү катары Орто-Нура айылынын 64 жаштагы Ш.Х. аттуу тургуну кармалып, убактылуу кармоочу жайга киргизилди.
Учурда тергөө амалдары жүрүп жатат.
