Москвада 18 жаштагы мекендешин өлтүрүүгө шектелип төрт кыргызстандык кармалды
- 1 год мурун
Кыргызстандын Ички иштер министрлиги Орусиянын Москва шаарында төрт кыргызстандык адам өлтүрүүгө шектелип кармалганын кабарлады.
ИИМдин маалыматына ылайык, ушул жылдын 22-мартында таңкы саат 04:10 чамасында Москвадагы Павшино кичирайонунун полиция бөлүмүнө Подмосковный бульварындагы үйлөрдүн жанында эс-учун жоготкон адамдар жатканы тууралуу маалымат түшкөн.
Окуя болгон жерге полициянын кезмети жөнөтүлүп, Кыргызстандын эки жаранын бычакталган абалда табышкан. Алар Чүй облусунун Сокулук районунун 2005-жылы туулган тургуну К. уулу А. жана Жалал-Абад облусунун Сузак районунун тургуну 2004-жылы туулган Х.Р. экени аныкталган.
К. уулу А. окуя болгон жерде каза таап, Х. Р. аймактык ооруканага жеткирилген.
Бул факты боюнча Орусиянын Кылмыш-жаза кодексинин 105-беренеси («Адам өлтүрүү») менен 30-105-беренесинин (эки же андан көп адамды өлтүрүүгө аракет кылуу) негизинде кылмыш иши козголуп, анын алкагында шектүү катары Кыргызстандын 2003 жана 2002-жылы туулган төрт жараны кармалган.
Тинтүү учурунда шектүүлөрдүн жанынан пневматикалык тапанча жана бычак табылган. Алдын ала маалыматтар боюнча, кылмыш чырдын негизинде жасалган. Жакында сот шектүүлөрдүн баш коргоо чарасын тандайт.
