Кыргыз-тажик чек арасындагы Паскы-Арык тилкесинде ок атышуу токтоду
- 2 года мурун
Кыргыз-тажик чек арасындагы Паскы-Арык тилкесинде ок атышуу токтоду. Бул тууралуу УКМКнын Чек ара кызматынан билдиришти.
14-сентябрь саат 15:08ге карата Баткен районунун Паскы-Арык жерлигинде Тажик чек арачылары Баткен чек ара отрядынын “Самаркандек” чек ара заставасынын чек арачыларына көздөй ок атышкан.
Саат 08:10дон баштап Баткен облусунун аймагында тажик тараптын провокациялары менен коштолуп, улам ок атышуулар маал-маалы менен орун алууда.
Ошентип, саат 08:10до Булак-Башы аймагында куралдуу кагылышуу болуп, саат 14:00дө тажик тарап Как-Сай жерлигинде, ал эми саат 15:08де Паскы-Арык жерлигинде тажик тараптан ок атуулар башталган.
Кыргызстан менен Тажикстандын чек ара өкүлдөрү ок атышууну токтотуу боюнча сүйлөшүүлөрдү жүргүзүүдө.
Кыргызстан менен Тажикстандын чек ара өкүлдөрүнүн сүйлөшүүлөрү эми Паскы-Арык жерлигинде уланары күтүлүүдө.
Чек ара өкүлдөрү чыр-чатак орун алган жерлерди кыдырып, атышуулардын чоо-жайын такташууда.
