Караколдо Москва мамлекеттик университетинин филиалы ачылат
- 10 месяцев мурун
Караколдо М.В. Ломоносов атындагы Москва мамлекеттик университетинин филиалы ачылат. Бул тууралуу президенттик администрациянын басма сөз кызматынан билдиришти.
Президент Садыр Жапаров «Каракол шаарындагы М.В. Ломоносов атындагы Москва мамлекеттик университетинин филиалы жөнүндө» жарлыкка кол койду. Жогорку билими бар жогорку квалификациялуу кадрларды даярдоону андан ары өнүктүрүү жана өркүндөтүү жана Кыргызстан менен Орусиянын ортосунда жогорку билим берүү жаатындагы кызматташтыкты кеңейтүү максатында университеттин филиалы ачылат.
Москва мамлекеттик университетинин филиалынын иши Кыргыз Республикасынын жана Орусиянын мыйзамдарына ылайык жүргүзүлөт. Москва мамлекеттик университетинин филиалына абитуриенттерди кабыл алуу М.Ломоносов атындагы Москва мамлекеттик университети тарабынан белгиленген тартипте өтөт. Москва мамлекеттик университетинин филиалынын бүтүрүүчүлөрүн мамлекеттик жыйынтыктоочу аттестациялоо М. Ломоносов атындагы Москва мамлекеттик университети тарабынан белгиленген талаптарга, эрежелерге жана мөөнөттөргө ылайык жүргүзүлөт.
