Күрөш боюнча Азия чемпионатына бара турчу спортчуларга акча бөлүндү
- 2 года мурун
Каржы министрлиги күрөш боюнча Монголиянын Улан-Батор шаарында өтүүчү Азия чемпионатына бара турган спортчуларга каражат бөлүп берди. Бул тууралуу “Азаттык” радиосу Спорттун олимпиадалык түрлөрү боюнча дирекциясына шилтеме берип жазды.
Маалыматка ылайык, Финансы министрлиги баш-аягы 8 миллион сом которгон. Бул каражат Улан-Баторго бараткан 23 спортчу, алты машыктыруучу, эки дарыгер, бир укалоочу жана эки калыстын авиабилетине, аккредитацияга, ПЧР-тест жана күнүмдүк чыгымга жумшалат.
“Каражатка байланыштуу Финансы министрлигине Спорттун олимпиадалык түрлөрү боюнча дирекциясы март айында эле сунуштама жиберген. Министрлик акчаны бүгүн гана которду”, — деп билдирген дирекциянын басма сөз катчысы Айгерим Турдалиева.
Финансы министрлиги Дене тарбия жана спорт башкармалыгына 2022-жылдын апрель айына 99,6 миллион сом каралып, 14-апрелге карата анын 19 миллион сому бөлүнгөнүн билдирди. Мекеме мамлекеттик органдардын чыгымдарын каржылоонун тартиби бар экенин белгиледи.
Жогорку Кеңештин 14-апрелдеги жыйынында депутат Шайлообек Атазов кыргызстандык балбандарга эл аралык мелдешке баруу үчүн Финансы министрлиги акча которбой жатканын айтып, сынга алган.
Грек-рим күрөшү, эркин күрөш жана кыз-келиндер күрөшү боюнча Азия чемпионаты 19-апрелден 24-апрелге чейин Монголиянын Улан-Батор шаарында өтөт. Дене тарбия жана спорт департаменти мелдешке Кыргызстандан 23 балбан катышаарын билдирген. Алардын катарында Жоламан Шаршенбеков, Акжол Махмудов, Эрназар Акматалиев, Айсулуу Тыныбекова, Мээрим Жуманазарова, Айпери Медет кызы бар.
