Иманкулов ШКУнун коопсуздук боюнча жыйынында Ооганстан маселесин көтөрдү
- 2 года мурун
Бүгүн, 19-августта Өзбекстандын Ташкент шаарында Шанхай кызматташтык уюмуна (ШКУ) мүчө мамлекеттердин Коопсуздук кеңештеринин катчыларынын 17-жолугушуусу өттү.
Жолугушууда Кыргызстандын Коопсуздук кеңешинин катчысы Марат Иманкулов ШКУ мейкиндигинде коопсуздуктун абалы Ооганстандагы кырдаалга түздөн-түз байланыштуу экенин айтып, ооган маселелери боюнча эл аралык кызматташтыктын негизги приоритети экономиканы жандандыруу, өлкөнүн экономикалык өнүгүүсүнө жана регион аралык процесстерге интеграциялануусуна көмөктөшүү болушу керектигин белгиледи.
Мындан тышкары ал жаңы чакырыктардын жана коркунучтардын, ошондой эле маалыматтык-коммуникациялык технологиялар чөйрөсүндөгү кылмыштар, баңгизаттарды мыйзамсыз жүгүртүү, трансчек аралык уюшкан кылмыштуулуктун иш-аракеттери бул кооптуу көрүнүштөрдү зыянсыздандырууга комплекстүү мамилени талап кылып жатканын белгиледи.
“Бул контекстте ШКУ геосаясий өнүгүүнүн маанилүү борборлорунун бири болуу менен “үч коркунучтун” (терроризм, экстремизм, сепаратизм) күчтөрүнө каршы туруу боюнча натыйжалуу механизмдерди иштеп чыгууну жана коопсуздукту камсыздоо маселелери боюнча кеңири спектрдеги кызматташтыкты өнүктүрүүнү улантат”, — деди Марат Иманкулов өз сөзүндө.
Жыйынга Казакстандын, Кыргызстандын, Орусиянын, Өзбекстандын, Тажикстандын, Беларустун жана Монголиянын Коопсуздук кеңештеринин катчылары, Индиянын премьер-министринин Улуттук коопсуздук боюнча кеңешчисинин орун басары, Кытайдын коомдук коопсуздук министри (онлайн), Пакистан өкмөтүнүн Улуттук коопсуздугунун бөлүмүнүн катчысы, ШКУнун Башкы катчысы, ШКУнун Регионалдык антитеррордук түзүмүнүн аткаруу комитетинин директору катышты.
Жолугушууда ШКУ мейкиндигинде коопсуздукту камсыз кылуу, терроризмге, сепаратизмге жана экстремизмге, мыйзамсыз курал-жарак жана баңгизаттарды мыйзамсыз жүгүртүүгө, трансулуттук уюшкан кылмыштуулукка, ошондой эле эл аралык маалыматтык коопсуздукту камсыз кылуу боюнча кызматташууну өнүктүрүү маселелери талкууланды.
