Эсептөө палатасынын кызматкерлери кармалды
- 2 года мурун
Эсептөө палатасынын кызматкерлери кармалды. Бул тууралуу УКМКнын басма сөз кызматынан билдиришти.
Маалыматка ылайык, Эсептөө палатасынын Бишкек шаары, Чүй жана Талас облустары боюнча аймактык бөлүмүнүн кызматкерлери тарабынан системалуу түрдө пара алуу жана берүү фактысы аныкталды.
«Эсептөө палатасынын аталган бөлүмүнүн жетекчиси К.М.М. кызматтык абалынан пайдаланып, кызматтык мөөнөтүнүн кыска мөөнөтүндө аудитордук текшерүүлөрдүн жылдык, кварталдык пландарын даярдоодо жана түзүүдө, ошондой эле текшерүү объекттери боюнча инспекторлорду бөлүштүрүүдө туруктуу коррупциялык схеманы түзгөндүгү такталды. Алсак, К.М.М. белгилүү бир акчалай сыйлык үчүн мамлекеттик инспекторлордун жакындарын максималдуу аярлуу жана финансылык жактан камсыз болгон мамлекеттик жана муниципалдык уюмдарга жөнөткөн, алар кийин объекттердин жетекчилерин опузалап, пара берүүгө көндүрүшкөн. 5-декабрда жүргүзүлгөн тергөө-ыкчам иш-чаралардын алкагында Эсептөө палатасынын аймактык бөлүмүнүн жетекчиси К.М.М., ошондой эле мамлекеттик инспекторлор М.Ж.Д. жана К.Ж.О. кармалып, КР УКМКнын убактылуу кармоочу жайына киргизилди», — деп жазылат маалыматта.
Азыркы учурда коррупциялык схеманын башка катышуучуларына карата мындан ары кармоо жана кылмыш жоопкерчилигине тартуу үчүн тиешелүү тергөө–оперативдүү иш-чаралар улантылууда.
