Даниэл Ажиев вебкам бизнес иш-аракеттерин токтотконун билдирди

Улуттук коопсуздук мамлекеттик комитетинин убактылуу абак жайында жаткан Даниэл Ажиев УКМКнын төрагасы Камчыбек Ташиевге кайрылып, мурдагы вебкам бизнес иш-аракеттерин токтотконун видео тасма аркылуу Инстаграм баракчасында билдирди.

“Мен мурдагы алып барган иш-аракеттеримди толугу менен токтоттум, толугу менен баш тартам. Бир жылдан ашты, мен УКМКнын түрмөсүндө камактамын. Сиздин көңүлүңүздү маанилүү нерсеге бургум  келет. Эң маанилүү дегеним, бул вебкам бизнес менен чет элдин жарандары менен чет өлкөдө гана иштечүмүн, арасында биздин улуттун кыздары жок. Тергөө тарабы да иш кагазында аракеттер чет өлкөдө болгонун жазды. Биздин улутубузга,  биздин коомго, биздин өлкөбүзгө эч кандай зыян келтирилген жок” деди Ажиев.

Э.А. аттуу жаран аталган “вебкам” студия оператору болуп туруп, эмгек тартибин бузгандыгы үчүн администратор Н.Ш. тарабынан психологиялык басымга кабылып, ал тарабынан зомбулук көрсөтөм деп коркутуу жолу менен арыздануучудан 2000 АКШ доллар талап кылганы аныкталган.

Бул факты Даниэл Ажиевге таандык үч чоң студияда тинтүү иштерин жүргүзүүгө негиз болуп, ал жерлерде 30 оператор жана ар кандай интернет-платформаларда (атайын түзүлгөн интернет сайттар) акчалай сыйлыкка интимдик мүнөздөгү кызматтарды көрсөтүү боюнча иштерди уюштуруу үчүн колдонулган 80 даана компьютердик техника болгон.

Белгиленген топтун мүчөлөрү чет мамлекеттердин аймагынан бул жаатта иштөө үчүн Даниэл Ажиев тарабынан түзүлгөн аянтчаларда интимдик мүнөздөгү кызматтарды көрсөтүп, эбегейсиз киреше алып турган “моделдер” делген кыздарды тартууну уюштурушкан.

Белгилей кетсек, операторлор үч нөөмөт менен иштешкен, кызматкерлердин жалпы саны болжол менен 18 жаштан 25 жашка чейинки 300гө жакын адамды түзөт. Кылмыш ишинин алкагында мыйзамсыз аракеттердин бетин ачкан буюм далилдери алынып, бул топтун үч активдүү мүчөсү кармалып, аларга тиешелүү айып тагылып, Бишкек шаарынын Биринчи Май райондук соту тарабынан камакка алуу түрүндөгү баш коргоо чарасы тандалган.

Даниэл Ажиев кылмыш-жаза жоопкерчилигинен качуу максатында 2023-жылдын 31-майында Кыргыз Республикасынын аймагынан чыгып кеткендигине байланыштуу, ага издөө жарыяланган. жана андан кийин УКМКнын талабы менен БАЭге учууга аракет кылып жаткен жеринен Өзбекстан аймагынан кармалган.

 УКМК менен Өзбекстандын компетенттүү органдарынын координацияланган иштеринин натыйжасында 2023-жылдын 4-июнунда Д.А. кылмыш жоопкерчилигине тартуу үчүн Кыргыз Республикасына өткөрүлүп берилген.