Чек ара кызматынын мурдагы төрагасы Замир Молдошев каза болду
- 2 года мурун
Чек ара кызматынын мурдагы төрагасы Замир Молдошев каза болду. Бул тууралуу Чек ара кызматынын басма сөз кызматынан билдиришти.
7-июнда 69 жашында Чек ара кызматынын экс-төрагасы генерал-майор Замир Молдошев дүйнөдөн кайтты.
Молдошев 1953-жылы 25-сентябрда Кыргыз ССРдин Ош облусунун (азыркы Жалал-Абад облусу) Сузак районунун Октябрьское айылында төрөлгөн.
Аскердик карьерасын 1971-жылы Самарканддагы Жогорку аскердик танкалык училищесине тапшыруу менен баштаган. Молдошев 1986-жылы Бронетанкалык аскерликтер аскердик академиясын, 2000-жылы Орусиянын Куралдуу Күчтөрүнүн Генералдык штабынын Аскердик академиясын аяктаган.
Молдошев Замир Мурзабекович взводдун командиринен Кыргыз Республикасынын Чек ара кызматынын төрагасына чейинки жетекчилик кызмат орундарын аркалаган.
Ал тажик-афган мамлекеттик чек арасында кызмат өтөгөн тынчтык орнотуучу батальонду түзүүчүлөрдүн бири болгон. Генерал-майор Молдошев З.М. “Центразбат” тынчтык орнотуу окууларында катышкан Борбордук-Азия батальонун калыптандыруучулардын башында турган. НАТОнун күчтөрү Кыргызстандын, Казакстандын, Өзбекстандын, Орусиянын жана АКШнын “Центразбат” бөлүкчөлөрү менен биргеликте тарыхта биринчилерден болуп бул окууларга катышкан.
1999-2000-жылдардагы Баткен окуяларынын жүрүшүндө көрсөткөн жеке эрдиги жана билгичтик менен башкаргандыгы үчүн Молдошев “Эрдик” медалы менен сыйланган.
Генерал-майор Молдошев аскердик милдетин аткарып жатып өмүрүн берген чек арачы-аскер кызматчыларынын элесин өчүрбөй сактап калуу ишине өзгөчө салым кошкон. Анын демилгеси менен Бишкек шаарында Чек арачыларды даңазалоо аллеясы түзүлүп, ал жер чек арачы-аскер кызматчыларынын ар түрдүү муундарын бириктирүүчү жерге айланды.
