Чек ара чыры: Баткенде акыркы 31 үй пайдаланууга берилгени турат
- 3 года мурун
Кыргыз-тажик чек ара чырында жабыркаган Көк-Терек, Таш-Тумшук жана Достук айылдарында дагы 31 үй жакынкы күндөрү толук бүтүрүлүп, пайдаланууга берилет. Бул тууралуу «Азаттык» радиосу президенттин Баткен облусундагы өкүлчүлүгүнүн басма сөз катчысы Азат Курбанбековдун маалыматына таянып жазды.
Курбанбековдун айтымында, быйыл жазында кыргыз-тажик чек арасында болгон куралдуу жаңжалда жабыркаган үйлөрдүн ордуна жалпысынан 140 үй жаңыдан курулууда. Мунун ичинен 100 үй Лейлек районунда толугу менен бүткөрүлүп, ээлерине тапшырылган. Ал эми Баткен районундагы Ак-Сай айылында тогуз үй бүтүп, 18-октябрда пайдаланууга берилген.
Быйыл, 28-30-апрелден 1-майга чейин Баткенде кыргыз-тажик чек арасындагы куралдуу жаңжалда жалпы 136 үй, бир нече мектеп, бала бакча жана башка социалдык объектилер өрттөлүп, талкаланган. Аларды калыбына келтирүү үчүн атайын эсеп ачылып, карапайым тургундар, ишкерлер, алыс-жакынкы чет өлкөлөрдө жүргөн мигранттар жиберген акча атайын эсепке чогултулган. Натыйжада жалпы 119 млн. 695 миң 848 сом чогулган.
Куралдуу жаңжалда Кыргызстан тараптан 36 киши (арасында эки бала) каза болгон, 180ден ашуун адам жараат алган.
Тажик тараптан 19 киши өлүп, 87си жарадар болгону расмий кабарланган. Эки өлкө бири-бирин айыптап, кылмыш ишин козгогон.
