Бишкекте таштанды иргей турган жай ачылды
- 2 года мурун
Бишкек шаарында таштанды иргей турган пункт иштей баштады. Пилоттук долбоордун алкагында таштанды сорттоо үчүн атайын эко-жай Биринчи май районунун аймагындагы Панфилов көчөсү №188/2 дарегинде ачылды.
Мэриядан билдиришкендей, эко-жайдын жалпы аянты 147,1 чарчы метр, анда 12 евроконтейнер, эки видеобайкоо камерасы орнотулган.
«Таштандыны иргөө үчүн 15-16 чарчы метр иш бөлмө курулуп, суу, канализация жана электр энергиясы менен камсыздалды. Таштанды контейнерлерин жаан-чачындан коргоо үчүн атайын бөлүнгөн жердин үстү тосулду. Ошондой эле контейнерлерди орнотууда жакынкы үйлөрдүн калкы да эске алынган, — деп айтылат маалыматта.
Долбоордун максаты — жарандардын маданиятын калыптандыруу жана экологиялык аң-сезимди өнүктүрүү, экологиялык абалды жакшыртуу жана ден соолукту сактоо, жеке компанияларды тартуу жана шаардын киреше бөлүгүн көбөйтүү.
Мэрия мындай аянтчаларды жайгаштыруу иштери башка райондордо дагы улантылып жатканын билдирди.
