Бишкекте акын Зайырбек Ажыматовду эскерүү иш-чарасы өттү

  • 6 месяцев мурун

Бишкекте акын Зайырбек Ажыматовду эскерүү иш-чарасы өттү. Бул тууралуу Жогорку Кеңештин басма сөз кызматынан билдиришти.

Иш-чарада акындын сөзүнө жазылган чыгармалар аткарылып, ырлары көркөм окулду. Жогорку Кеңештин төрага Нурланбек Шакиев сөз сүйлөп, акындын өмүр жолуна токтолду.
«Зайырбек Ажыматов Алыкул Осмонов, Сүйүнбай Эралиев, Омор Султанов өңдүү залкарлардын жолун улаган улуу акын. Балким тирүүсүндө баалабадык, татыктуу сый көрсөтө албадык. Бирок ал өзүнө чыгармачылыктын бийик мунарасын куруп кетти. Андыктан көзү өтсө да  ыр сүйгөн кыргыз элинин эсинде түбөлүккө жашай берет», — деди Шакиев. 

Ошондой эле Зайырбек Ажыматовдун көзү тирүүсүндө «Нөлү көп жылдар» аталышындагы эмгегине демөөрчү таап, чыгарууга көмөктөшкөнүн айткан Нурланбек Шакиев: «Ал чыгармачылык менен гана алектенип, башка дүйнөгө жутунбаган, сезимтал акын эле», — деп эскерди.

Муну менен катар «Зайырбектей акындарыбызды даңазалоо менен руханий көрөңгөбүздү байытып, маданиятыбызды өнүктүрө алабыз. Андыктан мындай иш-чараларды байма-бай өткөрүп, таланттарыбызды эскерип турушубуз керек», — деп кошумчалады. 

Андан тышкары, акындын жакын досу, депутат Мирлан Самыйкожо, маданият, маалымат, спорт жана жаштар саясаты министринин орун басары Кайрат Иманалиев баштаган жетекчилер, замандаштары жана маданият өкүлдөрү сөз сүйлөштү.

Ыр кеченин соңунда жаңы эле негизделген Зайырбек Ажыматов атындагы фонд тарабынан жаш акындар Айзат Кудайберди кызына, Улукбек Омокеевге жана журналист Нурболот Азаматка «Зайырбек Ажыматов» атындагы адабий сыйлыктар ыйгарылды. 

Белгилей кетсек, «Жалгыздык”, “Мелмил”, “Нөлү көп жылдар” аттуу ыр жыйнактарынын автору Зайырбек Ажыматов  2020-жылы 44 жашында дүйнө салган.

Муну бөлүшүү

Журналисттик иликтөөлөр

Помочь проекту

договором оферты