Баткенде жаңылана турган 22 имараттын чыгымы эсептелди
- 2 года мурун
Баткенде кыргыз-тажик чек арасындагы соңку куралдуу кагылышта талкаланган социалдык-маданий мекемелердин 17си капиталдык ремонтко муктаж. Дагы беш социалдык объектти кайра башынан куруу керек. Бул тууралуу 29-сентябрда Баткендеги окуяга байланыштуу ачылган медиа штаб кабарлады.
Маалыматка ылайык, оңдолуп, курула турган объектилердин долбоорлоо-каржылоо документтерин даярдоо үчүн бул күндөрү Баткенде Архитектура, курулуш жана турак жай-коммуналдык чарба боюнча мамлекеттик агенттиктин адистери иштеп жатышат.
Жергиликтүү Жарандык коргонуу комиссиялары Баткен жана Лейлек райондорунда жалпы 622 үй жабыркаган болсо, анын 427си жашоого жараксыз, 195и оңдоп-түзөөгө муктаж экенин аныктады. Ошондой эле 11 административдик объект, 8 мектеп, 7 бала бакча, 3 ФАП, 323 сарай, 197 жашоо-тиричилик камсыздоочу объект талкаланып, өрттөлгөн. Ак-Суу дарыясындагы узундугу 36 метрлик көпүрө жардырылып, 27 автоунаа өрттөлгөн же талкаланган.
14-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги «Тажикстандын алдын ала пландаган куралдуу агрессиясы» деп атаган. Дүйшөмбү да ушундай эле айып койгон.
