«Баш тартпайм». Таштандыдан табылган ымыркайдын энеси мындай кадамга баруунун себебин айтты

Акыйкатчы Жамиля Джаманбаева таштандыдан табылган наристенин ишин жеке көзөмөлүнө алды. Бул тууралуу Акыйкатчы институтунун басма сөз кызматынан билдиришти.

«Жалпыга маалымдоо каражаттарына таштанды челектен табылган ымыркай тууралуу маалымат жарыялангандан кийин Акыйкатчы институттун кызматкерлерине баланын укуктарын коргоону камсыздоо тапшырмасын берди.

Институттун Балдардын, аялдардын жана үй-бүлөнүн укуктарын коргоо боюнча бөлүмүнүн кызматкерлери тиешелүү мамлекеттик кызматтардан баланын абалы тууралуу маалымат алышты. Дарыгерлер берген маалыматка таянсак, бала шаардагы төрөт үйлөрүнүн биринде дарыланууда, ал дарыгерлердин көзөмөлүндө болуп жатат.

Акыйкатчы институтунун кызматкерлери бул ишке шектүү А.С.ны милициялар кармаар замат 1-тергөө абагына барып, кармалган  аялдын кармоо шарттары менен таанышкан. Бирок кызматкерлер барган учурда ал ооруканага операция жасатуу үчүн кеткени белгилүү болгон.

Ооруканага барган Институттун кызматкерлери аял менен маектешти», — деп жазылат маалыматта.

Ал өзүнүн версиясын айтып берди. Аялдын айтымында, баланы өзү эч кимдин көмөгү жок эле үйдөн төрөгөн. Кош бойлуу экенин ата-энесинен жашырып жүргөн. Анын айтымында, катуу коркуп жана стресс абалында баланы таштанды челекке таштап салган.

Кылмыш жасоого шектүү аял баланын атасы ким экенин тууралуу маалыматты айтып берүүнү каалаган жок. Бирок баланын атасы ким экенин биле турганын айтты.

“Мен жөн гана коркуп кеттим. Өз баламдан баш тартпайм. Мен аны эч кимге бербейм. Мени ата-энем кечирди жана алар баламды багып алабыз деп жатышат”,-деди ал.

Бишкек шаардык сотунун чечими менен 14-ноябрда А. С. сыртка чыкпоо тил каты менен бошотулду.