Бакыт Төрөбаев «Санарип аймак» маалыматтык тутумун ишке киргизүү маселеси боюнча кеңешме өткөрдү
- 2 года мурун
Министрлер кабинетинин төрагасынын орун басары Бакыт Төрөбаев «Санарип аймак» автоматташтырылган маалыматтык тутумун ишке киргизүү маселеси боюнча кеңешме өткөрдү. Бул министрлер кабинетинин басма сөз кызматынан билдиришти.
Учурда бул маалыматтык тутум 484 жергиликтүү өз алдынча башкаруу органдарында ишке киргизилип, иштеп жатат (бул 452 айыл өкмөт жана 32 шаар мэриясы).
Мамлекеттик колдоого муктаж үй-бүлөлөр жөнүндө маалыматтардын толуктугун, актуалдуулугун жана аныктыгын камсыз кылуу максатында «Санарип Аймак» автоматташтырылган маалыматтык тутумуна киргизилген «Аз камсыз болгон үй-бүлөнүн социалдык паспорту» функционалдык модулу иштелип чыккан.
Буга чейин тиешелүү мамлекеттик органдарга жана жергиликтүү бийлик органдарына аз камсыз болгон үй-бүлөлөрдүн электрондук социалдык паспортторун толтуруу иштин жыйынтыктоо тапшырмасы берилген. Бул иштердин жыйынтыгында бардык 219 миң 704 социалдык паспорт түзүлүп, аз камсыз болгон үй-бүлөлөрдүн жалпы санынын 100 пайызын түзөт.
Бакыт Төрөбаев жыйындын жүрүшүндө мамлекеттик жана жергиликтүү бийлик органдарына бир катар тапшырмаларды берди, анын ичинде «Санарип аймагы» системасын толтурууну тездетүү жана «Санарип аймак» аркылуу кожолуктарды толтуруу, катталган тургундардын жана ал аркылуу берилген маалымкаттардын көрсөткүчтөрүн 2022-жылдын август айына карата 75 пайызга чейин жеткирүү тапшырмасын берди.
Эмгек, социалдык камсыздоо жана миграция министрлигине, Санариптик өнүктүрүү министрлиги жана министрлер кабинетине караштуу Мамлекеттик кызмат жана жергиликтүү өз алдынча башкаруу иштери боюнча агенттик менен бирдикте аз камсыз болгон үй-бүлөлөрдүн интерактивдүү социалдык картасын иштеп чыгуу тапшырылды.
