Ала-Букада мыйзамсыз алтын казууга аракет кылганга шектелгендер кармалды

Ала-Букада мыйзамсыз алтын казууга аракет кылганга шектелгендер кармалды. Бул тууралуу Ички иштер министрлигинин басма сөз кызматынан билдиришти.

Ала-Бука РИИБге кен казуучу фирмалардын биринин күзөт бөлүмүнүн кызматкери билдирүү менен кайрылган. Анда 20-январга караган түнү болжол менен саат 04:05 чамасында кен казуучу ишкананын кире беришинен Чаткал районунун тургундары кармалгандыгын билдирген. Мындан сырткары кен казуучу фирманын мыйзамдуу өкүлү 1974-жылы туулган А.Т. арыз менен кайрылып, кармалган балдарга мыйзам чегинде чара көрүп берүүнү суранган.

Бул окуя боюнча топтолгон материалдар Ала-Бука РИИБинин Кылмыштар жана жоруктардын бирдиктүү реестрине Кылмыш-жаза кодексинин 37-беренеси (Кылмыш жасоого аракеттенүү) жана 205-беренесинин (Уурдоо) негизинде катталып, кылмыш иши козголгон.

Козголгон кылмыш ишинин алкагында Чаткал районунун тургундары 1978-жылы туулган О.Р., 1990-жылы туулган К.Т., Т.Э., 1991-жылы туулган К.С., 1996-жылы туулган С.Г. кармалышып, Ала-Бука РИИБинин убактылуу кармоочу жайына киргизилген.

Алардын баш коргоо чарасы Ала-Бука райондук сотунда каралып, баары үй камагына чыгарылган. Азыркы учурда кылмыш ишинин алкагында шектүүлөрдүн башка шериктери бар же жок экендигин тактоо боюнча тергөө иштери толугу менен жүргүзүлүп жатат.