«АгроТехЭкспо-2018» жарманкеси суукта өтүп, дыйкандар келбей калды

Бишкекте жыл сайын май айында өткөрүлчү  айыл чарба техникасынын жана продукциясынын көргөзмөсү быйыл 14-15-ноябрда өткөрүлүп жатат. Жарманкеге катышкан фермерлердин саны жылдагыдан аз. Жылда Республиканын бардык облустарынан өкүлдөр келип катышса, бул жолу дээрлик баары Чүй облусунан. Катышуучулардын айтымында, мунун себеби жарманкенин ызгаар суукка калганына жана фермерлерге маалыматтын жетпей калганына байланыштуу.

Ахмет Кесек, “Агротүрк” компаниянын ээси:

“Көргөзмө май айларында өтсө болмок”

Түркиядан келген «Агротүрк» компаниясынын ээси Ахмет Кесек аймактагы тургундарга маалымат берилбей калса керек деген оюн айтты:

—2013-жылдан бери Кыргызстанда айыл-чарбар техникасын сатып иштейбиз. Жыл сайын катышабыз. Адатта май айында өткөрүлчү.

Быйыл, ноябрда өткөрүүнү чечишиптир. Аба суук дагы болгондонбу, же башка аймактардагы тургундардын кабары жоктугунанбы, адамдар жылдагыдай көп эмес. Балким, жергиликтүү же улуттук медиа аркылуу маалымат жакшы берилбей  калды.

Бир жагынан эл көнүп калган. Жыл сайын апрель же май айларында өткөрүлүп келген, адамдар дагы ошол датаны күтүп жүрүшү мүмкүн. Ошондуктан, мындан кийин да май айларында өткөрүлсө жакшы болмок.

Айгүл Умарова, “Чабрец” компаниясынын өкүлү:

“Жергиликтүү өндүрүүчүлөр гана катышып жатат”

—Сокулуктан келдик. Кызыгып, сурап келгендер көп эле. Бирок, кечээкиге караганда бүгүн эл аз. Дээрлик жергиликтүү гана өндүрүүчүлөр катыпшып жатат. Ал эми техника боюнча башка аймактардан келгендер бар, бирок аз.

Жусуп Ташыров, “Гумат KG” компаниясынын башчысы:

“Кийинки жылы Ошто өтсө, ага да катышабыз”

—Мурда “Айыл-Агро” деп уюштурулчу. Ал 5 жыл катары менен болду. Быйыл айыл чарба министирлиги өзү колго алып, уюштурду.

Бир аз кечирээк болуп калды, 10-15 күн эртерээк уюштурганда жакшы болмок. Күн дагы суук болуп жатпайбы. Кийинки жылы Ошто өткөрүлөт экен, ага дагы катышабыз. Кызыгып сурап келгендер болуп жатат.

Октябрдын аягында болсо дыйкандар дагы көбүрөөк келмек. Азыр сууктун айынан түштүктөн, башка региондордон келгендер аз. Көбүнчө Чүйдөн келгендер эле.

Нурлан Кожогулов, Айыл чарба, тамак өнөр жайы жана мелиорация мнистрлигинин Механикалаштыруу жана энергетика департаментинин жетекчиси

“Дыйкандардын абалын эске алып, ноябрда уюштурдук”

—Май айында дыйкандарда каражат жок да. “Жаз жарыш” деп баарын айдап, сээп койгондуктан техника, продукция сатып алууга мүмкүнчүлүгү болбойт.

Ошондуктан, өтүнүчтөр боюнча ноябрда өткөрүүнү чечтик. Эми бир аз суукка туш болуп калды. Бирок, жылдагыдан эки эсе көп техника коюлду.

Америка, Германия, Түркиядан ж.б. өлкөлөрдөн чыккан техника жана продукциялар сунушталды. Кыргызстандын бааардык аймактарынан чакырганбыз. Массмедиа аркылуу роликтерди берип, маалыматты жеткиргенге аракет кылдык.

Техниканын түрү бар. Бирок, ала турган киши жок….

Келгендердин ар бирине сүйүнгөн катышуучулар

Багы ачылбаган үрөндөр

Ызгаар суукка карабай чыккан катышуучулар

Техникалар дыйкандарды күтүп…

Көп орундар бош турат

Башка облустардан өкүлдөр келсе минтип бош турмак эмес

Мындай суукка баннерлер гана чыдайт

Багын күткөн үрөндөр

Борбор Азияда ири көргөзмөлөрдүн бири болгон “Айыл-Агро” 2017-жылы 17 майда Бишкекте өткөн. Ага 20 өлкөдөн келген 30 компаниянын продукциялары жана техниканын 50 түрү көргөзүлгөн. Ал эми кыргызстан 7 облусунан экспозициялар менен Кыргызстандын бул тармактагы потенциалы көргөзүлгөн.

Ырысбү Кылычбек кызы

Сүрөттөрү: автордуку