Аутист балдар иштеген кулинария

Жаш ишкер-айымдар Аида Мамбеталиева менен Асель Куандыкова өзгөчө кулинария ачып иштетип жатканына эки ай болду. Өзгөчө дегенибиздин себеби, бул жерде аутист балдар эмгектенет.

Мындай кулинария ачууга адегенде аутист балдардын курсун ачуусу түрткү берген. Учурда кулинариянын иши жакшы жүрүп жаткан чагы. Кирешенин жарымын “Рука в руке” аутист балдардын ата-энелеринин коомдук бирикмесине жардам катары беришет.

“Адегенде аутист балдардын курстарын ачканбыз. Мындан эки жыл мурун. Анда алардын ата-энелерин дагы кошуп окутканбыз. Анан TIKAнын долбоору тууралуу угуп калып, ошонун колдоосу менен кулинарияны ачтык. Бул балдарды өзүм 8 ай бою окутканмын” дейт Аида.

Учурда 2 бала эмгектенет, жакында дагы бирөө кошула турганын айтат ишкер айым. Алар картошка арчып, сабизди кыргычтан өткөрүп, капуста туурап кулинария ээсине жардам беришет. Өзгөчө балдар эмгекти абдан сүйөрүн, жумушка абдан так экенин белгилейт Аида.

“Булар аябай жумушка так болот. Өз убактысында так келишет, өздөрүнө бөлүнгөн жумушту майын чыгарып аткарып, аягында таштандыларын чогултуп, таштанды салгычка ыргытып анан кетишет. Күнүнө 1-2 сааттан гана иштешет, андан көп иштесе бат чарчап калышат. Саатына 50 сомдон төлөнөт. Жумуш көп болуп кеткенде балдардын ата-энелери дагы келип жардам берип турушат” дейт ишкер.

Бек Оморбеков, Нуркыяз Туркменов