Салттуу музыка жумалыгы

Бүгүн Салттуу музыка жумалыгы жыйынтыкталып,  гала-концерт өтөт. Т.Сатылганов атындагы Улуттук филармонияда Салттуу музыка жумалыгынын жабылыш аземине арналган оозеки салттагы профессионалдык  музыкалык искусство чеберлеринин жана кароо-сынактын жеңүүчүлөрүнүн  Гала-концерти болот.

Анда сынактын жеңүүчүлөрү өнөрлөрүн көрсөтүшүп, сыйлыктарга ээ болушат.

Уюштуруучулар: КР маданият, маалымат жана туризм министрлиги, “Кыргыздын салттуу музыкасы” фонду, КР Улуттук илимдер академиясы, Кыргыз-Түрк “Манас” университети.

Эскерте кетсек, Бишкекте ушул жылдын 20-25-апрелде ар жылкы  Салттуу музыка жумалыгы өтүп жатат.

Салттуу музыка жумалыгы үч этапка бөлүнгөн. Айтуучулук, аспаптык жана вокалдык-аспаптык искусство өнөрү, “Дастан күнү”, “Күү күнү”, “Ыр күнү”.

Конкурс “Санат” телевидениесинин студиясында өтүүдө.

Т. Абдымомунов атындагы Кыргыз улуттук драма театрында музыкалык аспапты алгачкы ойлоп табуучу Коркут тууралуу “Коркут” спектакль-драмасы болот. Ал эми кечээ жана бүгүн, 24-апрелде, Улуттук илимдер академиясында “Глобалдаштыруу доорунда салттуу музыка искусствосунун ролу” деп аталган эл аралык илимий-практикалык конференция уюштурулган.

Жыйынтыктоочу концерт бүгүн, 25-апрелде, саат 18:00дө Т. Сатылганов атындагы Улуттук филармонияда өтөт.  Кирүү акысыз.

Бул туралуу Маданият, маалымат жана туризм министрлигинин басма сөз кызматы маалымдады.