Сапар Исаковдун жана башкалардын соту 27-февралда уланат

Бишкек электр борборун модернизациялоо ишиндеги коррупция фактысы боюнча борбор шаардын Свердлов районунда экс-премьер-министри  Сапар Исаковдун жана дагы 7 аткаминердин соту кийинки шаршемби, 27-февралда уланат. 

Бишкек электр борборун модернизациялоо боюнча экс-премьерлер Сапар Исаков, Жантөрө Сатыбалдиев, энергетика экс-министри Осмонбек Артыкбаев, «Улуттук энергохолдинг» компаниясынын экс-төрагасы Айбек Калиев, экс-орун басар  Жолдошбек Назаров, «Электр станциялары» ишканасынын экс-жетекчиси Салайдин Авазов, ЖЭБди модернизациялоо долбоорунун экс-аткаруучу директору Темирлан Бримкулов жана финансы экс-министри Ольга Лаврованын сот ишинин баштапкы угуусу  бүгүн, 18-февралда, болду.

Сапар Исаковдун жактоочусу Нурбек Токтакуновдун айтымында бүгүнкү соттук отурум баштапкы угуу. Кийинки сот  процесси келерки шаршемби, 27-февралда уланат.

Атттары аталган 8 киши Бишкек жылуулук электр борборун модернизациялоо боюнча Кытайдын ТВЕА компаниясы менен келишим түзүү жана андан мамлекетке келтирилген 111 млн доллардан ашуун каражат зыян келтирилди деген кылмыш иши боюнча айыпталууда.