Өзбекстан менен Орусия болочок атомдук электр станциянын курулушу боюнча макулдашты

«Узатом» агенттиги менен «Атомстройэкспорт» (“Росатомдун” инженердик бөлүмү) Өзбекстанда болочоктогу аз кубаттуу атомдук электр станциясынын курулуш аянтында ишти баштоо боюнча протоколго кол коюшту. Бул тууралуу агенттиктин басма сөз кызматы 10-сентябрда билдирди.

“Узатомдун” маалыматына караганда, аз кубаттуулуктагы атомдук электр станциясынын долбоору боюнча алдын ала иштер жайында башталган. Июнь айында болочок атомдук электр станциясынын аймагында курулуш штабынын биринчи жыйыны өтүп, анда биринчи кезектеги милдеттер аныкталган. Бул белгиленген мөөнөттө ишти баштоого мүмкүндүк берет.

Августтун аягында келечектеги атомдук электр станциясынын куруучулары үчүн вахталык лагерди түзүү боюнча иштер башталган.

Аз кубаттуу атомдук электр станциясын куруу боюнча келишимге 27-майда Орусиянын президенти Владимир Путиндин Ташкентке жасаган иш сапарынын алкагында кол коюлган.

«Росатомдун» жетекчиси Алексей Лихачев станцияны ишке киргизүү этап-этап менен, 2029-жылдан 2033-жылга чейин ишке ашарын билдирди. Объект Жизак облусунун Фариш районундагы Тузкан көлүнүн жанына жайгашары айтылууда.

Сүрөт: uzatomagency

​