“Сарай-Сай” кенинен 1100 тоннадан ашык алтын рудасы мыйзамсыз ташылган

Жалал-Абад облусунун Чаткал районундагы “Сарай-Сай” кенинен 1100 тоннадан ашык алтын рудасын мыйзамсыз ташып чыгуу фактысы аныкталды.

Бул тууралуу 1-июлда Улуттук коопсуздук мамлекеттик комитетинин (УКМК) басма сөз кызматы билдирди.

Аталган факт боюнча кылмыш изи козголуп, 25-июнда УКМК тарабынан үч кииш- М.Д.З, М.А.Б. жана Ч.И.Б. кармалган.

Алар мыйзамсыз ташылган 1100 тоннадан ашык алтын рудасын жасалма документтер менен Кара-Балта тоо-кен комбинатына кийин сатуу максатында ташып келишкен.

“Кармалгандар жасаган кылмыштарын мойнуна алып, 2024-жылдын 27-июнунда Бишкек шаарынын Биринчи май райондук сотунун чечими менен кармалгандардын экөө УКМКнын тергөө абагына киргизилген”,- деп айтылат маалыматта.

Кармалган үчүнчү жарандын бөгөт чарасы тууралуу маалымат берилген эмес. Ошондой эле, кылмышка тиешеси болушу мүмкүн делген башка адамдарды аныктоо иши башталганы айтылды.

Иллюстрациялык сүрөт: Интернет булактарынан