ӨКМ: Ысык-Көлдө куткаруучулар күчөтүлгөн тартипте иш алып барууга өттү  

Бүгүн, 18-августта, саат 19:30 чамасында нөшөрлөп жааган жамгырдын кесепетинен Чолпон-Ата шаарындагы Тогуз-Булак сел өтүүчү каналы аркылуу топтолгон суу агып, каналдан ашып кетүү коркунучу жаралган.

Бул тууралуу өзгөчө кырдаалдар министрлиги (ӨКМ) билдирди.  

ӨКМдин Ысык-Көл облусу боюнча башкармалыгынын башчысы М.Карабаев жетектеген ыкчам топ жана шаардык Жарандык коргонуу кызматынын комиссиясы аталган каналды көзөмөлдөөдө.

Учурда Чолпон-Ата шаарында абал туруктуу.

Облус аймагындагы аба ырайынын кескин өзгөрүүсүнөн жана ыкчам иш-чараларын жүргүзүү максатында райондук жана шаардык ӨКБнын кызматкерлери күчөтүлгөн тартипте иш алып барууга өттү.

Бүгүн, 18-августта, саат 15:30 чамасында жааган жаандын кесепетинен Жети-Өгүз районунун Кызыл-Суу айылындагы Чоң-Кызыл-Суу суусунун деңгээли көтөрүлүп, Москва көчөсүндө жайгашкан кашардын короосун суу каптады.

11-августта Ысык-Көл районунда нөшөрлөгөн жамгырдын кесепетинен Чолпон-Ата шаарынын Тогуз-Булак тилкесиндеги кокту-колоттордон аккан суу көчөлөрдү каптады жана “Жүдөмүш” каналында сел жүрдү.

Ошондой эле Бостери, Бактуу-Долоноту айылдарындагы бир нече көчөлөрдү жана Булан-Сөгөттү айылын сел суулары каптады. Куткаруучулар тарабынан Бактуу-Долоноту айылынан 1 үй-бүлө коопсуз жайга убактылуу көчүрүлдү.

11-августта саат 18:10 чамасында жааган жаандын кесепетинен, Тоң районундагы Балыкчы—Бөкөнбаев унаа жолунда да сел жүрдү. 

12-августта селдин кесепеттерин жоюу максатында Чолпон-Ата шаарына өзгөчө кырдаал режими киргизилди.

Чолпон-Ата шаарында 12-августта кечки саат 21:20 чамасында нөшөрлүү жаандан улам кокту-колоттордон келген сел суулары сел өтүүчү Тогуз-Булак каналынан ашып, жакын жайгашкан турак үйдүн, дүкөндүн короосуна кирген.

Сүрөт: Видеодон алынды