Депутат Нуржигит Кадырбеков мандатын тапшырат

Жогорку Кеңештин депутаты, «Ыйман нуру» фракциясынын лидери Нуржигит Кадырбеков Борборбук шайлоо комиссиясына депутаттык мандатын тапшыруу боюнча арыз жазды. Бул тууралуу Боршайкомдун басма сөз кызматы «Азаттыкка» билдирген.

Эске салсак, 22-августта Нуржигит Кадырбеков Улуттук коопсуздук боюнча мамлекеттик комитетине (УКМК) сурак берип чыккан. Сурактан чыккандан кийин ал журналисттерге учкай комментарий берип, «Ыйман» фондунун ишмердигине байланыштуу күбө катары көрсөтмөлөрдү бергенин билдирген. Ал ошондой эле тергөөнүн купуялуулугун сактоо боюнча кагазга кол койгонун, калган деталдарды айта албай турганын кошумчалаган. Депутат суракка жактоочусу жок кирген эле.

Нуржигит Кадырбеков 2015-2019-жылдары «Ыйман» диний маданиятты өнүктүрүү коомдук фондунун жетекчиси болуп иштеген.

Буга чейин «Ыйман» фондунда дайны чыкпай калган 5 млн доллар боюнча ызы-чуу чыккан эле. Анда фонддун ишмердигин текшерген аудит Түркиянын өкмөтү бөлгөн 5 миллион доллардан ашык акчанын отчету жок экенин аныктаган. Бул иш боюнча фонддун мурдагы эсепчиси камакка алынганы айтылган.

Сүрөт: Интернет булактары