Азимбек Бекназаров 2-ноябрга чейин камакка алынды

Саясатчы Азимбек Бекназаров 2-ноябрга чейин камакка алынды. Бул тууралуу анын уулу Руслан Бекназаров билдирди.

Уулунун айтымында, Улуттук коопсуздук мамлекеттик комитетинин СИЗОсунда орун жоктугуна байланыштуу, Бишкектеги СИЗО-1 абак жайына жаткырылды.  

Улуттук коопсуздук боюнча мамлекеттик комитети (УКМК) тарабынан Азимбек Бекназаровго 2010-жылдын апрель айында болгон окуялардын жүрүшүндө банк ячейкаларынан жана Өкмөт үйүнөн алынган акча каражаттарын уурдоо жана коротуу фактысы боюнча кылмыш иши козголду.

“Тергөөнүн жүрүшүндө Убактылуу өкмөттүн мурдагы мүчөсү Азимбек Бекназаровдун укук коргоо органдары тарабынан көрсөтүлгөн жагдайлар боюнча камакка алынган ири суммадагы акча каражаттарын ыйгарууга катыштыгы бар экендиги аныкталган. Ошондой эле тергөөнүн жүрүшүндө алынган маалыматтар Азимбек Бекназаров Ысык-Көлдүн курорттук зонасынын аймагында, Бишкек шаарында, Чүй жана Жалал-Абад облустарында кымбат баалуу кыймылсыз мүлк объекттерин сатып алуу жана аларды башка адамдарга тариздөө аркылуу кылмыш жолу менен алынган акча каражаттарын мыйзамдаштыргандыгын айгинелейт. Буга байланыштуу 12-сентябрда Азимбек Бекназаров  кылмыш-жаза кодексинин 222-беренесинин 3-бөлүгүнүн 3-пунктунда (Легалдаштыруу, кылмыштуу кирешелерди ири өлчөмдө адалдоо) каралган кылмышты жасаган деген шек менен кармалып, УКМКнын убактылуу кармоочу жайына киргизилди” деп айтылат УКМК маалыматында.

12-сентябрда Кемпир-Абад иши боюнча сотто сурак берип жүргөн саясатчылардын бири — Азимбек Бекназаров Улуттук коопсуздук мамлекеттик комитети (УКМК) СИЗОсуна камакка алынганын уулу Руслан Бекназаров билдирди.

Сүрөттө: Азимбек Бекназаров. Интернет булактарынан