АКШда төрт америкалык Кремлдин кызыкчылыгына иштөөгө айыпталууда

АКШда сот арачылары төрт америкалык жаранды Орусиянын кызыкчылыгы үчүн АКШда иш алып барган деп тапты.

Бейшембиде АКШнын Юстиция министрлигинин сайтында сот арачылары Сент-Луистин жашоочулары Омали Йешителу (82 жаш), Пенни Хесс (78 жаш), Жесси Невел (34 жаш) жана атланталык кенже Огастес Ромейн (38 жаш) чет элдик өкмөттүн кызыкчылыгына иш алып баруу үчүн кутум уюштурган деп тапканы жазылды.

Сотто берилген маалыматтарга ылайык, бери дегенде 2015-жылдын майынан 2022-жылдын июлуна чейин соттолуучулар «АКШ аймагында орус өкмөтүнүн кызыкчылыгы үчүн иш-аракет кылышкан».

Юстиция министрлигинин маалыматы боюнча, сыягы төрт айыпталуучу тең “Орусиянын антиглобалисттик кыймылынын” президенти Александр Ионов менен байланышы болгон.

Ар бир айыпталуучу беш жылга чейин эркинен ажыратылышы мүмкүн. Өкүм чыгара турган күн азырынча белгилене элек.

Ионов ФСБ менен көптөн бери кызматташып, Экинчи кызматтын (расмий түрдө Конституциялык түзүлүштү коргоо жана терроризмге каршы күрөшүү кызматы деп аталат) тапшырмаларын аткарган. Анын милдеттерине АКШдагы саясий кыймылдарды тымызын колдоо, АКШда соттолгон Мария Бутинага жардам берүү, ошондой эле орусиялык ММКлар менен Телеграм-каналдардагы керектүү темаларды “алдыга жылдыруу” болгон.

Сүрөт: justice.gov