Ак-Сайда дайынсыз жоголгон 6 адамдын бирөөсүнүн сөөгү табылды

Бүгүн, 18-октябрда Чаткал районунун Ак-Сай тоосунда дайынсыз жоголуп жаткан алты адамдын бирөөсүнүн сөөгү табылды. Бул тууралуу Өзгөчө кырдаалдар министрлиги (ӨКМ) билдирди.

Маалыматка ылайык, куткаруучулар саат 12:45терде көчкү түшкөн аймактан 46 жаштагы К.К. аттуу жарандын сөөгүн табышкан. Сөөк тик учак менен Кумбел тилкесиндеги штабка алынып келинген.

Эске салсак, кечээ, 17-октябрда ӨКМ Чаткалда кар көчкүнүн алдында калышы мүмкүн делген 6 адам изделип жаткандыгы тууралуу маалымат берген.

ӨКМнын маалыматы боюнча, 9-октябрь күнү Каныш-Кыя айылынын тургундары жана бир чет элдик жаран, жалпы 14 адам, эндик өсүмдүгүнүн тамырын издөөгө тоого кеткенден кийин дайынсыз болуп жатышкан. Ал эми 16-октябрда издөө иштеринин натыйжасында 8 жаран аман-эсен табылган, ал эми калган 6 кишинин кар көчкү алдында калышы мүмкүн деген маалымат берилген.

Издөө иштерине Өзгөчө кырдаалдар министрлигинин жалпы 20 куткаруучусу жана бир тик учак тартылып, зарыл болгон бардык техникалык жабдуулар колдонулуп жатканы айтылган.

Сүрөт: ӨКМнын басма сөз кызматы