Муфтият: Вакцина орозону бузбайт
- 3 года мурун
Кыргызстан мусулмандар дин башкармалыгынын фатва бөлүмүнүн адиси Бактияр Токтогазы уулу коронавируска каршы эмдөө орозону бузбай турганын билдирди.
“Эгер кимде ким орозодо, оозу бек учурунда вакцина алам десе эч нерсе болбойт”.
Муфтияттын маалыматы боюнча, быйыл орозо айы болжолдуу 13-14-апрель күндөрү башталат.
Өлкөдө коронавируска каршы эмдөө 29-мартта башталды. Алгач Бишкек, Ош шаарларында жана Чүй облусунда “кызыл зонада”, бейтапканада, «Тез жардамда» иштеген медицина кызматкерлери, мугалимдер жана күч органдарынын өкүлдөрү эмделери айтылган.
Эмдөө ыктыярдуу негизде, атайын ачылган пункттарда жүргүзүлөт. Бул үчүн Кытайдын SinoPharm компаниясы чыгарган вакцина колдонулууда. 75 миң адамга эсептелген 150 миң доза вакцина Кыргызстанга 19-мартта келген.
Сүрөт: Интернет булактарынан.
