​Койчуманова: Конституциянын жаңы долбоорундагы адам укуктарын бузган нормага көңүл буруу керек

Жаңылыктар

Улуттук илимдер академиясынын Гуманитардык иликтөөлөр борборунун жетекчиси, тарых илимдеринин доктору, профессор Чолпон Койчуманова 23-ноябрдагы Конституциялык кеңешменин жыйынында Конституциянын жаңы долбоорунун 23-беренесине көңүл бурууга чакырды.

Анда “Кыргыз Республикасында жалпы таанылган ыймандык баалуулуктарга, Кыргызстан элинин каада-салттарына, ошондой эле эл аралык стандарттарга каршы келген басылмаларга, анын ичинде электрондук алып жүрүүчү басылмаларга, оюн-зоокторго жана коомдук иш-чараларга тыюу салынат” деп жазылган.

“Баалуулуктар менен каада-салтты ар ким ар башкача түшүнөт. Бүгүнкү күндө ким баалуулуктарга жана каада-салтка аныктама бере алат? Анда ошол баалуулуктарды жана салттарды мыйзамда санап өтүш керек, бирок аны эч ким жасабайт, себеби ар кимдин түшүнүгү ар башка. Бул берене менен каалаган кишини жоопко тартууга болот. Коомчулук дал ушул беренени сындап жатат, бул чоң карама-каршылыктарга алып келет. Бул жерде адам укуктары олуттуу түрдө бузулуп жатат”, деди Койчуманова. Ал Конституциялык кеңешменин мүчөлөрүн дал ушул нормага көңүл бурууга чакырды.

17-ноябрда парламенттин 80 депутаты Конституциянын жаңы долбоору боюнча референдум дайындоо тууралуу мыйзам долбоорун коомдук талкууга алып чыгышкан. Кийин айрым депутаттар мындай демилгесинен баш тартканын билдиришти. 20-ноябрда президенттин милдетин аткаруучунун жарлыгы менен конституциялык кеңешме түзүлүп, коомдук талкууга коюлган долбоор талкуулана баштады.

Долбоорду колдогондор эгер ал кабыл алынса Кыргызстанда бийликтин жоопкерчилиги күчөй турганын белгилеп жатышат.

Ал эми каршы болгон коомдук-саясий күчтөр Конституция өзгөрсө Кыргызстан авторитардык өлкөгө айланат деп кооптонууда. 20-ноябрда Бишкекте алар "Жарандар бийликтин узурпациясына каршы!" деген чукул жыйын өткөрүп, жаңы долбоорду . Бул жыйынга катышкандар Конституциялык кеңешменин курамына киргизилген жок. Айрым укук коргоочулар Кыргызстанда Конституциянын коомдук талкууга коюлган жаңы долбоору жарандардын кызыкчылыгын коргоого эмес, президенттин бийлигин хандыкындай кылып бекемдөөгө багытталганын белгилеп жатышат.