ЕБ өлкөлөрү 1-июлдан тартып чек арасын ача баштайт
- 4 года мурун
Еврокомиссия Шенген зонасына кирген ЕБ өлкөлөрүнө 1-июлдан тартып баскыч—баскыч менен тышкы чек араларды ачууну баштоого сунуштама берди. Комиссия бул убакытка чейин биримдиктеги өлкөлөр арасындагы чектөөлөр алынат деген көз карашта.
30-июнга чейин ЕБнын чек аралары үчүнчү өлкө жарандары үчүн жабык болот. Еврокомиссия 1-июлдан тартып бир нече категориядагы чет өлкөлүктөр үчүн, анын ичинде студенттер жана жогорку квалификациялуу жумушчулар үчүн чек араны ачууну сунуштоодо. Чөлкөм азырынча туристтерди кабыл албайт.
Бул арада 1-июлдан тартып Евробиримдикке кирбеген бир нече Балкан өлкөлөрүнүн жарандары үчүн дагы чек араны ачуу сунушталууда.
Андан аркы чечимдер эпидемиологиялык кырдаалга жараша болот.
Ал арада Шенген зонасына кирген өлкөлөрдүн консулдуктары тарабынан виза берүүнү жандандыруу үчүн критерийлер да иштелип чыкты, бирок так датасы айтыла элек.
Еврокомиссиянын сунуштарын ЕБ өлкөлөрү жактырышы керек.
Евробиримдикке кирген өлкөлөрдүн көбүндө коронавирус жуктурган жана өлгөн кишилердин саны азайууда.
Булак: Борбор Азия жаңылыктар кызматы.
