Өмүрбек Бабанов: «Тирешүүнү токтотууга чакырам»

Жаңылыктар

Өмүрбек Бабанов кыргызстандыктарга, Президент Сооронбай Жээнбеков менен мурдагы президент Алмазбек Атамбаевге фейсбук баракчасы аркылуу кайрылды.

-Алакандай Кыргызстаныбызда кайрадан жүрөк үшүн алчу окуя болуп кетпесин! Элибиз менен укук коргоо кызматкерлерибизди козутпай, бөөдө кырсыкты курчутпай, тезинен бул тирешүүнү токтотууга азыркы президент Сооронбай Шарипович менен экс-президент Алмазбек Шаршеновичти чакырам!

Учурдагы окуяга жоопкерчилик баары бир гана өлкө президентине тийиштүү болуп калат. Тилекке каршы, курмандык болду. Азыр бул жарандык тирешүүгө алып келип бараткан жеке конфликттин улантылышына эч жол бербей, токтотуш керек!

2002 - жылы Аксыдагы кан төгүүгө жол бергендиги үчүн элибиз Акаевди эч качан кечирбейт, 2010 - жылы Таластагы жана Бишкектеги кан төгүүлөр үчүн элибиз Бакиевди эч качан кечирбейт. Каргашалуу тарыхыбызды экинчи эч кайталабайлы, элибиз эле кыйналат!

Кой-Ташта жүргөн адамдар да, ал жакка жөнөтүлгөн атайын бөлүктүн кызматкерлери да биздин жарандарыбыз, өзүбүздүн эле уулдарыбыз, кыздарыбыз, эжелерибиз, байкелерибиз! Аларды алдыга түртүп, өмүрлөрү менен тагдырларына балта чабуу чоң кылмыш!

Бул тирешүү мындан да чоң кесепеттерге алып келиши ыктымал!

Элимди курмандыкка чалбай, жеке кызыкчылыктарды тыюуга чакырам!
Эч бир иш канга тете эмес!

Апрель айында да провокациялар болооруна, алардын азабын тарапташтарым тартаарына көзүм жеткендиктин айынан гана эстегенде эки көзүм төрт болгон өз элиме, өз жериме келбедим.

Азыр болсо учурдагы жаңылыктарды тиктеп, жан-дүйнөм эңшерилип турат. Буга кантип жол берилди?

Экөөңүздөрдү тең бул тирешүүнү токтотууну жана токтошуңуздарды суранам!!! Алааматка жол ачпай, элибиздин тынчтыгы үчүн, уул-кыздарыбыздын амандыгы үчүн!

Бул абалды кызытып жибербей, кармап калыш керек.
Атайын операцияны токтотуу абзел!

Бийлик акылга таянып иш кылат деп күтөм.

Каза болгон жапжаш инибиздин үй-бүлөсүнө, жакындарына терең кайгыруу менен көңүл айтам.
Жаратканым элиме тынчтык берсин, эл уулдарына сабырдуулук тартууласын, - деди Өмүрбек Бабанов.

7-августта Кой-Ташта Алмазбек Атамбаевди кармоо боюнча атацйвын операция болуп, анын кесепетинен 40 тан ашык киши жарадар болуп, атайын отряддын бир кызматкери каза тапты.


ЖаңылыктарАлмазбек АтамбаевКой-ТашСооронбай Жээнбеков7-август