Ак-Буура дайрасына унаа менен кулап кеткендердин акыркысы изделүүдө
- 5 лет мурун
Бүгүн, 16-июлда, Ош облусунун Ноокат районунун Ак-Буура дайрасына унаа менен түшүп кеткен төрт кишинин акыркысынын сөөгү изделип жатат.
Бул тууралуу Өзгөчө кырдаалдар министрлигинин басма сөз кызматы билдирди.
Буга чейин 14-июлда Ак-Буурага унаа менен кулагандардын арасынан эки эркек, бир аялдын сөөгү табылган.
Ош облусунун Ноокат районунда 14-июлда саат 17:30 чамасында, Ош-Папан-Кожокелен унаа жолунун 60-чакырымында Ак-Буура суусуна ВАЗ-21099 үлгүсүндөгү унаа түшүп кеткендиги тууралуу маалымат кабарланган. Унаада 3 эркек, 1 аял болгон.
Ршро күнү кечинде 1963-жылы туулган Р.И. аттуу кишинин сөөгү табылган. 15-июлда саат 07:20да 1946-жылы туулган Р.Э. аттуу кишинин сөөгү табылган.
15-июлда саат 19:00 чамасында 1960-жылы туулган Р.И аттуу аялдын сөөгү жергиликтүү тургундар тарабынан табылып, ИИМ кызматкерлерине өткөрүлүп берилген.
Түн киргенине байланыштуу кечээ, саат 21:00дө издөө иштери убактылуу токтотулган.
Бүгүн издөө иштери улантылууда.
Сүрөт: Интернет булактарынан.
