Назарбаев Москва менен Киевди сүйлөшүүгө чакырды
- 7 лет мурун
- Иликтөөлөр
Казакстандын президенти Нурсултан Назарбаев Орусия менен Украинаны сүйлөшүүлөрдү өткөрүүгө чакырды. Бул тууралуу казак маалымат каражаттары билдирүүдө.
Мамлекет башчынын айтымында, Батыш өлкөлөрүнүн Орусияга каршы киргизген санкциялары менен Орусиянын жооп катары көргөн чаралары башка аймактарга да таасир этүүдө.
«Украинанын түштүк-чыгышындагы окуялар эки өлкөнүн айтышуусуна алып келди. Буга алардын бардык достору, анын ичинде мен дагы өзгөчө өкүнүп атам. Биз тараптарды ортодогу маселелерди чечүү үчүн олуттуу сүйлөшүүлөрдү өткөрүүгө чакырабыз. Буга альтернатива жок. Кандай гана жаңжал болбосун, анын ичинде дүйнөлүк согуштар да сүйлөшүүлөр жолу менен аяктайт. Биз эки тарапты ушуга чакырабыз», — деди Назарбаев.
Мамлекет башчы Казакстан сүйлөшүү жараянына жардам берүүгө даяр экенин айтып, Жыйырмалык саммитинин алкагындагы Орусия менен АКШ президенттеринин жолугушуусуна чоң үмүт артып жатканын белгиледи.
АКШ менен Европа биримдиги Москвага каршы санкцияларын 2014-жылы, Орусия Украинанын Крым жарым аралын аннексиялап алгандан кийин киргизип, андан бери бир нече жолу кеңейтип, мөөнөтүн узартышкан. Украинанын чыгышындагы кагылышуулар башталгандан бери анда кеминде 10 миң киши каза болду. 2015-жылдын февралында келишилген Минск макулдашууларына карабастан өлкө чыгышындагы согуш дагы деле уланууда.
