Орок айылында түн ичинде мыйзам бузуу катталган жок

Жаңылыктар

Чүйдүн Сокулук районуна караштуу Төмөнкү Орок айылында кармалган 32 киши үйүнө кое берилди.

Мушташка түздөн-түз тиешеси бар деген экөө азырынча милициянын убактылуу кармоочу жайында.

Ички иштер министрлигинин маалыматына караганда, айылдагы коомдук коопсуздукту Сокулук райондук жана Чүй облустук милициясы көзөмөлдөп жатат.

Түн ичинде кандайдыр бир мыйзам бузуулар катталганы тууралуу маалымат жок.

Кечээ, 5-июнда, Төмөнкү Орокто айт намаздан кийин чыгып баратып үч өспүрүм мушташа кеткен, жабыркаган экөө азыр ооруканада жатат, бири нейрохирургия бөлүмүндө.

Факт Кылмыш менен жоруктардын бирдиктүү реестрине 266-берене («Ээнбаштык») менен катталды. Шектүү катары кармалган эки адамдын (алардын бири өспүрүм) бөгөт чарасы 48 саат ичинде аныкталышы керек.

Окуя болгон жерде ички иштер министри Кашкар Жунушалиев өзү жүрдү.

Кечээ Сокулуктун Жаңы-Жер айылында да өспүрүмдөр ортосунда уруш чыкты. Ал жакка ички иштер министринин орун басары Курсан Асанов барды. Абал туруктуу, кармалгандар жана жабыркагандар тууралуу маалымат жок.

ЖаңылыктарЧүйСокулукОрок