18 октябрь 2018
Бишкек убактысы: 04:05


Душанбеде Кыргызстан менен Тажикстан президенттери жолугушту


Кыргызстандын президенти Сооронбай Жээнбеков менен Тажикстандын президенти Эмомали Рахмон чек араны делимитациялоо боюнча түзүлгөн кыргыз-тажик өкмөт аралык комиссиясына ишти илгерилетүү боюнча тапшырма беришти.

Бул тууралуу кыргыз президентинин Тажикстандагы расмий сапарынын убагында эки өлкөнүн мамлекет башчылары айтышты.

— Эки өлкөнүн чек арасын юридикалык жактан каттоо биздин мамлекеттердин арасында өтө актуалдуу маселелердин бири. Биз чек аранын калган тактала элек бөлүктөрүнүн үстүндө иш алып барууга даярдыгыбызды билдиребиз, — деди тажик президенти Эмомали Рахмон.

Президент Сооронбай Жээнбековдун Тажикстандагы расмий сапарында соода-экономикалык кызматташуу жана коңшулук мамилени бекемдөө багытында 8 документке кол коюлду.

Эмомали Рахмон менен Сооронбай Жээнбеков Борбордук жана Түштүк Азиядагы энергетикалык рынокту бириктирүүчү КАСА-1000 долбоорун ишке ашырууда бирге аракет көрүүнүн маанилүүлүгүн белгилешти.

Президент Сооронбай Жээнбеков 1-февралда Тажикстандын Душанбе шаарына расмий иш сапары менен барды. Бул сапар тажик президентинин чакыруусу менен өтүүдө. Бүгүн Жээнбеков Тажикстандын премьер-министри жана парламент төрагасы менен жолугушуу өткөрөт.